Menos pantallas e máis xogos activos! Entre os 5 e os 17 anos o noso corpo necesita acumular un mínimo de 60 minutos diarios de actividade física. Descobre que actividades son máis convenientes e con que frecuencia deben practicarse coas pirámides de actividade física para nenos e adolescentes.
- Se os nenos e mozos non realizan actualmente ningunha actividade física, a súa práctica a un nivel inferior do recomendado é mellor que ningunha e reportaralles máis beneficios que non facer nada.
Canta actividade física deben realizar?
Os nenos e mozos de 5 a 17 anos deben acumular un mínimo de 60 minutos diarios en actividades físicas de intensidade moderada a vigorosa. Se a actividade física supera os 60 minutos recomendados reportará un beneficio aínda maior para a saúde.
A actividade física debería ser aeróbica na súa maioría. Como mínimo tres veces por semana convén incorporar actividades de fortalecemento muscular. Ademais han de realizar exercicios de flexibilidade entre 3 e 7 días por semana.
Como poden alcanzar estas recomendacións?
Para os nenos e mozos deste grupo de idade, a actividade física consiste en xogos, deportes, desprazamentos, actividades recreativas, educación física ou exercicios programados, no contexto da familia, a escola ou as actividades comunitarias. É dicir, contan como actividades físicas xogar no parque, practicar algún deporte de equipo, ir camiñando ao colexio e á casa, actividades deportivas extraescolares, etc.
As pirámides de actividade física inclúen as recomendacións por grupo de idade. Fai clic nas imaxes miniatura para abrilas.
Pirámide de actividade física para nenos e nenas
Pirámide de actividade física para adolescentes
Son válidas estas recomendacións para todos os nenos e mozos?
Todo o que comentamos se pode aplicar a nenos e mozos sans, a menos que o seu estado médico indique o contrario, e é valedoiro tanto para rapaces como para rapazas.
No caso dos mozos inactivos, recoméndase comezar con pequenas doses de actividade para ir aumentando gradualmente a súa duración, frecuencia e intensidade. Debemos alentalos a participar en actividades físicas que os axuden ao seu desenvolvemento natural e sexan pracenteiras e seguras. A práctica de actividade física a un nivel inferior do recomendado é mellor que ningunha e reportaralles máis beneficios que non facer nada.
Sempre que sexa posible, os nenos e mozos con discapacidades deberían cumprir as recomendacións, consultando ao seu médico para coñecer ben os tipos e cantidade de actividade física que son apropiados para eles.